Blue Valley eredua aurkeztu dute, Roscoffetik (Frantzia) bultzatutako itsas bioteknologiako berrikuntza-ekosistema. Jardunaldia Interreg Espazio Atlantikoa 2021-2027 programak finantzatutako MARINNONET proiektu europarraren barruan kokatzen da.
Ekitaldia Manu Soto PiE-EHUko zuzendariak eta Aitor Garagarza Plentziako alkateak ireki dute, eta nazioarteko esperientzien trukeak udalerrian etorkizuneko kostaldea biziberritzeko jarduerak bideratzeko duen aukera azpimarratu dute.
Jardunaldian, Joy Toupet Blue Valley proiektuaren zuzendariak eta Gavin Fox Roscoffeko Station Biologiqueko nazioartekotze-arduradunak azaldu dute ekimen horrek itsas zientziaren inguruan Pays de Morlaixeko ikerketa-zentroen, erakunde publikoen, enpresen eta gizarte-eragileen arteko lankidetza-sare eraginkorra artikulatzea lortu duela. Helburua: ekonomia urdina bultzatzea itsas bioproduktuen garapenaren, akuikultura iraunkorraren eta biodibertsitatearen balorizazioaren bidez.
Bretainiako esperientzia inspirazio-iturri izan da Arpillaoko espazioaren etorkizunari buruz hausnartzeko. Arpillao itsasadarraren eta Plentziako PiEren ondoan dagoen aparkaleku zaharra da. Udalak gidatutako partaidetza-prozesu baten esparruan, gune hori ezagutza zientifikoarekin, itsas berrikuntzarekin eta tokiko garapen jasangarriarekin lotuko duten erabilera estrategikoak baloratzen ari dira.
