Maiatzaren 20tik 22ra, Greziako Rodas uhartean “Youth Engagement and FLAGs” europar mintegia egin zen, FAMENETek, Europako Itsas, Arrantza eta Akuikultura Funtsari laguntzeko sareak (FEMPA), antolatuta. Itsas Garapen Elkarteak nazioarteko topaketa horretan parte hartu zuen, eta bertan, gazteak, arrantza-sektoreko eragileak, Arrantzako Tokiko Ekintza Taldeak eta Europa osoko erakundeetako ordezkariak bildu ziren, helburu komun batekin: gazteak arrantza-komunitate erresiliente eta jasangarrien eraikuntzan inplikatzeko bide berriak aztertzea.
Mintegia Rodasko Sheraton hotelean egin zen, eta lan-saioak, jardunbide egokien trukeak eta bisitak uztartu zituen. Topaketaren unerik aberasgarrienen artean, Chalki uhartera egindako bisita nabarmendu behar da. Bertan, FEMPAk finantzatutako proiektuak aurkeztu ziren, gazteen ekintzailetza, berrikuntza eta itsasoari lotutako lurralde-garapena ardatz hartuta.
Jardunaldietan, belaunaldien arteko erreleboa sustatzera bideratutako esperientzia ugari partekatu ziren, Europako arrantza-lurralde askok partekatzen duten lehentasuna, eta arrantza-sektorearen orainean eta etorkizunean gazteek iraunkortasuna, prestakuntza eta parte-hartze aktiboa izateko estrategiak ere jorratu ziren.
Horrelako topaketetan parte hartzeak aukera ematen dio Itsas Garapen Elkarteari nazioz gaindiko lankidetza indartzeko, bere lan-ildoak ideia berriekin aberasteko eta aliantzak ehuntzen jarraitzeko erronka komunei heltzeko, hala nola sektorean erreleborik ez izatea, profil profesional berriak erakartzea edo Euskadiko kostaldeko eremuetan gazteen ekintzailetza bultzatzea.
